Continuan os vertidos de residuos da balsa mineira de Bama en Touro

pedro janvier 11, 2022

Ecoloxistas en Acción denuncia os continuos vertidos de residuos ao río do Burgo procedentes da balsa mineira de Bama en Touro.

Ecoloxistas en Acción denunciou ante Augas de Galicia e o Seprona que se están producindo continuos vertidos procedentes da balsa mineira de Bama, situada nos terreos da mina de Touro, pertencentes ao grupo Explotaciones Gallegas.

A organización ecoloxista sinala que as chuvias están arrastrando os residuos amoreados na contorna do denominado Humidal de Bama, espallando os residuos e lixiviados polos camiños e regatos da zona. Estas escorrentías de auga de cor escura, fétidas e con abundante espuma están contaminando o río do Burgo, afluente do río Brandelos, sendo este último, tributo do río Ulla.

Ecoloxistas en Acción ten alertado que nos terreos indicados a empresa propietaria deposita diariamente toneladas de residuos nos ocos mineiros e nas ladeiras entre as que se atopa a coñecida Balsa de Bama. Este amoreamento de residuos sen control é o causante dos continuos vertidos ao dominio público hidraúlico.

A organización ecoloxista lembra que non é a primeira vez que isto sucede, nin a primeira vez que se denuncia por parte das asociacións, polo que agarda que a administración competente adopte sin más demoras as medidas necesarias para impedir que prosiga a contaminación das augas da zona afectada.