- O Observatorio Ibérico da Minería, do que forma parte Ecoloxistas en Acción, documentou máis de medio milleiro de infraccións, a maioría asociadas a impactos ambientais ou a autorizacións ilegais. Andalucía e Galicia son os territorios con máis casos, con 24 e 21 respectivamente.
- Estes casos detallaranse no I Encontro Ibérico sobre os impactos sociais e ambientais da minería, que se celebrará do 12 ao 15 de outubro, organizado por Ecoloxistas en Acción e o Observatorio Ibérico da Minería.
O Observatorio Ibérico da Minería e Ecoloxistas en Acción organizan o primeiro encontro ibérico sobre os impactos sociais e ambientais da minería. Trátase da primeira edición deste espazo de reflexión, aprendizaxe e convivencia no participarán medio centenar de representantes de distintos movementos, plataformas e colectivos implicados na resistencia a proxectos mineiros de España e Portugal. Estremadura foi a comunidade escollida para celebrar este primeiro encontro pola avalancha de novos proxectos mineiros que afectan a este territorio, que inclúen as minas de litio de Cáceres e Cañaveral, a mina de níquel de Aguablanca ou a mina de cobre e ouro de Alconchel.
O Observatorio Ibérico da Minería (MINOB) lanzouse hai un ano para documentar as vulneracións de dereitos sociais e ambientais causados pola industria extractiva en toda a xeografía peninsular, facendo públicas as evidencias existentes sobre cada caso. Froito do traballo de investigación colaborativo de decenas de colectivos, entre os que se inclúe Ecoloxistas en Acción, esta semana presentáronse máis de 100 casos xeorreferenciados que desvelan a magnitude do problema.
O observatorio expón todo tipo de situacións, desde ataques, ameazas ou preitos intimidatorios contra activistas ata explotacións clandestinas que operan sen permisos ou sen someterse a unha avaliación de impacto ambiental. Tamén se documentan infraccións de dereitos laborais, como malas condicións de traballo ou obstáculos á actividade sindical. Moitas destas minas atópanse en espazos protexidos ou nas proximidades de poboacións, nas que provocan problemas de saúde e impactos ambientais por emisións de po ou contaminación das augas.
A maioría dos casos incluídos son de Andalucía, con 24 explotacións, e Galicia, con 21, pero Joám Evans, coordinador do observatorio, advirte que “isto é só a punta do iceberg”, xa que contan cunha lista de 400 casos pendentes de documentar e nos últimos meses uníronse entidades de territorios nos que ata o de agora non se estaban investigando. “É sorprendente atoparse con tantas explotacións ilegais, cando tanto desde o sector como desde as administracións insístese tanto no mito da minería responsable e sostible”, remarca Evans.
O portal documentou máis de 400 infraccións ambientais, que inclúen verteduras, contaminación por po ou afectación a bens culturais, e case 300 infraccións relacionadas coa falta de autorizacións ou permisos ilegais, falta de restauración ou avais financeiros e corrupción administrativa. Desde o observatorio conclúen que detrás destas malas prácticas está a falta de control polas administracións que xera un ambiente de impunidade xeneralizado.
O Observatorio Ibérico da Minería é unha iniciativa de cidadanía ambiental na que participan unha trintena de colectivos co apoio do Ministerio de Dereitos Sociais e Axenda 2030. No principio do ano foi distinguido cun premio da Universidade das Nacións Unidas pola súa metodoloxía participativa. O portal conta cun sistema de vixilancia e alerta temperá para detectar, mapear e denunciar vulneracións e malas prácticas, facilitando así o exercicio e a defensa dos dereitos ambientais e a mitigar as asimetrías existentes entre as comunidades afectadas e o sector extractivo. Con estes mecanismos, o proxecto pretende contribuír ás funcións de inspección e control das administracións públicas, así como a un mellor coñecemento sobre os impactos causados pola minería por parte das institucións, os medios de comunicación, os movementos sociais e as comunidades locais afectadas.
La entrada Presentan un mapeo de 100 casos de minas ilegais aparece primero en Ecologistas en Acción.
0 Commentaires